Hoekom is fosfor- en soutaanvulling noodsaaklik?

Fosfor is eerstens noodsaaklik vir energiebenutting, selgroei en seldifferensiasie. Diere wat blootgestel is aan ‘n ernstige fosfortekort verloor derhalwe vinnig gewig en kondisie. Fosfor speel ook n kritiese rol in die suur/basis-balans in die dier se liggaam.

Tweedens is fosfor saam met kalsium ook noodsaaklik vir beenvorming. Indien beeste ʼn fosfortekort ontwikkel, sal hulle ʼn kondisie genaamd pika ontwikkel, en begin om bene in die veld te vreet wat kan aanleiding gee tot lamsiekte.

Fosforbehoeftes neem toe tydens laat dragtigheid en bereik ‘n hoogtepunt gedurende vroeë laktasie.  

Sout (NaCl)  is noodsaaklik aangesien beide natrium (Na) en Chloor (Cl) betrokke is by die handhawing van osmotiese druk, beheer van waterbalans en regulering van suur/basis-balans. Soutbehoefte verhoog in die somer omdat meer sout in die vorm van sweet verlore gaan.

In teenstelling met energie en proteïen, bevat natuurlike weiding in die somer oor die algemeen nie voldoende fosfor (P) om in die behoefte van lakterende koeie te voorsien nie.  Somermaande (Desember, Januarie, Februarie) is tradisioneel ook kalftyd wanneer die P-behoeftes maksimaal is.   

Natuurlike weiding kan in die somer so min as 0.1% fosfor bevat en met ʼn daaglikse inname van 12 kg weiding per bees per dag (droëmateriaalbasis) word 12 g fosfor daagliks ingeneem vanaf weiding terwyl lakterende koeie 18g fosfor per dag benodig.

Soutfos 6-blokke

Vanaf bostaande is dit duidelik dat dit noodsaaklik is om sout en fosfaat daagliks aan te vul. Dit kan gedoen word deur Sernick se Soutfos 6-lekblok te gebruik. Hierdie produk bevat 6% P en bestaan uit ongeveer 50% natriumchloried.

Met ʼn lekinname van 100 g per bees per dag word 6 g addisionele fosfor vanaf die lekblok  ingeneem om die fosfor vanaf hul weiding effektief aan te vul.

Dragtige ooie met tweelinge benodig ongeveer 3.8 g fosfor per dag en indien hulle 2 g fosfor vanaf weiding inneem, benodig hulle ʼn addisionele 1.8 g fosfor per dag wat deur 30 g Soutfos 6 voorsien kan word.

Laastens bevat Soutfos 6 ook mikrominerale wat noodsaaklik is vir produksie, reproduksie en verhoogde immuniteit.

Lekblokke bied n praktiese alternatief vir konvesionele lekke aangesien dit grootliks waterbestand is tydens reën in die somer. Daarbenewens is dit ook maklik hanteerbaar. 

Geskryf deur Dr. Piet Swiegers